OS QUINQUILLÁNS preparan varias actividades arredor da celebración do Banquete de Conxo organizado polo Concello de Santiago.

O SÁBADO 14 de abril terá lugar un ROTEIRO TEATRAL baixo o título  DE CARRAL A CONXO POLOS VIEIROS DA LIBERDADE cos protagonistas do histórico Banquete de Conxo de 1856 (Aurelio Aguirre, Eduardo Pondal, Rosalía de Castro) Tamén participarán dous personaxes antagónicos á celebración; o Crego e o fidalgo Fandiño. Como representante do pobo estará a sorna da Cacheirana, unha muller que presenciou os acontecementos; desde os fusilamentos de Carral ata o Banquete de Conxo.

Este Roteiro Teatral partirá da PRAZA DE CERVANTES, pasando por SAN AGOSTIÑO, MERCADO DE ABASTOS, FACULTADE DE HISTORIA, ORFAS e PRAZA DO TOURAL.

O SÁBADO 21 de abril a compañía OS QUINQUILLÁNS e TÍTERES ALAKRÁN escenificarán en formato de títeres: DE CARRAL A CONXO POLOS VIEIROS DA LIBERDADE, unha montaxe ad hoc sobre a celebración do Banquete de Conxo, de carácter histórico e divulgativo, e destinada a todo tipo de públicos.

O DOMINGO 22 de abril  pola mañá terá lugar un ROTEIRO MUSICAL E TEATRAL onde artesáns, estudantes, traballadoras, labregas e os protagonistas do Banquete (Eduardo Pondal, Aurelio Aguirre, Rosalía de Castro) irán da man desde a Praza do Toural ata Conxo pasando por toda a zona nova de Compostela e as principais rúas de Conxo. Este é un roteiro participativo e fundamentalmente musical.

DOMINGO 22 de abril a medio día terá lugar a escenificación de O BANQUETE DE CONXO por OS QUINQUILLÁNS-TEATRO coa participación dos protagonistas do Banquete e de todos/as os/as presentes.

Esta produción ad hoc da compañía OS QUINQUILLÁNS para o Concello de Santiago incide na liña desenvolvida nos últimos anos pola compañía, as visitas teatralizadas e as montaxes de carácter histórico onde o teatro está tamén ao servizo do coñecemento, da diversión e da participación da xente.